日期：2022年3月10日 (星期四)
時間：14:00-15:00
節目：「精靈一點」環節「醫學會會診日」
主持：虞逸峯Dennis、江卓儀Sonia
主題：腦腫瘤如何影響視力
嘉賓：藍明權醫生 (神經外科專科醫生)

建議問題

第一部分(14:20-14:30)

1. 視力出現問題，為何與腦神經有關係？

試闡釋腦部如何接受影像資料。Dennis、Sonia你地好。視力出現問題，如果換眼鏡都改善唔到，連眼科醫生直接檢查眼球都找唔到原因，便可能是視覺神經或者腦部有問題。我先簡單講解一下我地係𠶧樣睇到嘢。單靠眼球是睇唔到嘢的。眼球負責收集影像資料，資料會經過視覺神經線，把資料傳到我地大腦後枕位置的枕葉分析資料後，我地先真正睇到嘢，同埋知道睇到甚麼嘢。比喻，大廈有CCTV，但係電線斷咗，或電腦關咗機，保安都看唔到有冇賊入咗來。

2. 哪些疾病會影響視覺神經或負責視力的腦神經？

常見有幾類疾病會影響視覺神經同大腦。第一是中風。第二是，大腦或視覺神經發炎。第三是，腦腫瘤。中風是指供應視覺神經和腦部的血管有阻塞，病人會突然間一隻眼或者每隻眼的左或右邊睇嘢變黑。由於好突然，而且影響範圍大，多數人都容易發覺有問題，找醫生醫。大腦和視覺神經發炎，有可能是病毒感染或因免疫系統失調型成的，種類比較多，今日唔詳細講解。第三樣症病是。腦腫瘤。每年香港有六百幾個新症，腦腫瘤比較多是生得慢的良性腫瘤，視力慢慢變差，所以比較容易被患者忽略，延誤咗治療。今日我希望講多啲這一方面，提醒市民如果視力變差，眼球又冇事，便要想想是否有腦腫瘤。如果能夠快些找出原因就可以快些治療。

3. 以腦腫瘤為例，為何會影響視力？

剛才提過我地可以睇到嘢，是需要視覺神經線由眼球傳訊號比大腦，再由大腦分析訊號。如果腦腫瘤壓迫視覺神經或者直接侵蝕大腦負責視力嗰部份，視力就會出現問題。兩條視覺神經由眼球後面經頭顱骨底部伸延入頭顱骨，然後交叉走位之後進入左右大腦半球，直至去到後枕位。由於神線經過的範圍很大，神經線在不同位置受壓都可以影響視力。

4. 患者在視覺上會出現哪些影像？

病人會覺得好似有塊窗簾摭住視線。早期可能只摭住眼尾邊的位置，嚴重的可能望一個人只見到半邊面，甚至完全黑晒。至於摭住那一位置，就視乎腫瘤的位置和壓力大唔大。這個和近視、老花不同，因為配眼鏡都幫唔到。同白內障或青光眼不同，因為白內障或青光眼，影象矇矇但不係一塊窗簾摭住個窗咁樣。

5. 腫瘤對視力影響多數是突發性？

不論良性或惡性腦腫瘤均有機會影響視力？腫瘤對視力影響多數是慢性的，腫瘤要時間長大的，良性腫瘤通常要好多年才長大，惡性腫瘤生得快但都要好多個月才大到影響視力。冇論是良性定惡性，只要壓迫視覺神經或侵入大腦，均會影響視力。

6. 承上題，哪些類型的腦腫瘤較容易影響視力？（腦下垂體瘤、腦硬膜瘤、膠質瘤）

好啊。有三樣腫瘤特別容易影響視力。第一樣，是腦下垂體瘤。每年香港有170個新症。這腫瘤九成九是良性的，慢慢長大。正常的腦下垂體是一粒小花生大的腺體，位于我地兩隻眼之間，眉心對入一隻手指深的位置。佢剛剛就在我地左右視覺神經交叉換位的位置下面。如果腦下垂腫瘤生長到好似鵪鶉蛋咁大，佢就會壓到視覺神經的交叉位置。病人如果仔細留意，會發覺，左眼的左邊，右眼的右邊有黑影。好似有窗簾摭住。不過我地習慣用兩隻眼睇嘢，好多病人都忽略咗這症狀，直至窗簾摭到連直望中間的影像都看唔到先去找醫生。有時由病發到找出原因可能要一年時間。我有位女病人40歲初就收經，佢以為是正常。一年後睇嘢變矇，佢又以為是老花。直至有一日佢眼攰，單眼看電話，才發現一行字只看到半行。佢用磁力共振素描確診是腦下垂體腫瘤。第二樣是腦硬膜瘤，每年香港有約260個新症。這是生長在頭顱骨和腦組織之間的良性腫瘤。如果佢生在視覺神經線附近，便有機會影響視力。由於是良性，由病發至確診有時要兩三年。我有個六十幾歲的男病人，佢一般身體很好。佢家人發覺佢在屋企，個頭右邊經常都撞到一個吊櫃同一個位，入門口又成日撞到右邊門鎖。家人成日話佢發雞盲。家人最後帶佢看眼科醫生，眼檢查只有輕微白內障。眼科醫生幫佢做詳細的視野測試，發覺病人兩隻眼的右上用閃光照射，病人都無反應。原佢行路是睇唔到右邊有野阻住，所以經常撞到右邊的家俬。醫生轉介磁力共振素第三種，是腦組織生長出來的膠質瘤，這腫瘤比較麻煩，因為它在腦入面滲透生長，不是從外邊壓迫腦部，而且可能是惡性。好在病發率冇其他腦腫瘤咁多，每年只有一百多宗。良性膠質瘤一般生在腦大半球的一邊。左邊腫瘤會影響右邊視力，右邊腫瘤影響左邊。

第二部分(14:40-15:00)

1. 哪些人士會較大機會出現腦腫瘤？

腦下垂體瘤15-45歲較多。腦硬膜瘤60歲已後隨年紀增加而增加。膠質瘤就甚麼年紀都會有小童或老人都可以有。一般女士較男士多一些。

2. 除了影響視力，還會出現哪些病徵？

除影響視力，大的腫瘤可以引至持續頭痛，頭暈，視力重影，走路不穩的問題。細腫瘤，視乎位置，可以引至三叉神經痛，面部麻木。腦下垂體瘤可以影響內分泌，或提早停經，乳房漲大和有分泌。

3. 如接受一般視力檢查後仍無法找出病灶，哪些檢查可以有助準確診斷與腦腫瘤相關？

醫生和病人面對面逐隻眼檢查視力範圍。這樣已經可以初步見到視力的影響。醫生發覺有問題就會安排用儀器做視野測試圖和腦部磁力共振素描。這些檢查，基本上可以確定係唔係腦腫瘤影響視力。

4. 上述提到腦腫瘤種類的治療方式是以切除手術為主？

對啊。腫瘤壓迫視覺神經，就好似石頭壓住一隻腳，如果唔想放棄隻腳，就要搬走塊石頭。影響視力的腫瘤大部份是良性腫瘤，良性腫瘤唔似癌症有化療或電療可以把腫瘤縮小。良性腫瘤的細胞和正常身體細胞相似，要用藥毒死良性腫瘤，對身體亦會有嚴重傷害，所以我地冇特別的藥物去醫良性腦腫瘤。有時我地會用放射治療(即是電療)醫良性腦腫瘤，但電療主要是停止良性腫瘤變大，電療後良性腫瘤須然可能會縮細一點，但縮得好慢，視覺神經線壓得太耐，會委縮，視力就不能完全康復。手術是最直接的治療方法，即時移走神經線的腫瘤，從而使視覺神經可以康復。

5. 在怎樣的情況下建議患者持續觀察而不用治療？

假如病人有多種疾病，不適合手術，或者患者覺得視力影響輕微，唔影響日常生活。病人可以持續觀察。不過，以上講的兩種的病人，唔做手術的話，都可以考慮用精準的放射治療，停止腫瘤生長，避免很多年後發覺腫瘤又大咗，病人身體又弱咗的兩難境況。

6. 如要接受腦腫瘤切除手術，會否大機會出現副作用？

現今手術治療良性腫瘤是非常安全。出現生命危險或嚴重傷殘的機會是好罕見。當然每個病人身體狀態不同，手術前要全面的身體評估，確定風險。良性腫瘤手術後一般康復好快，住院幾日，休息幾個星期就大至回復正常生活。但如果是惡性腫瘤，有侵蝕腦部和神經線，手術後未必可以完全康復。

7. 接受腦腫瘤切除手術後，視覺能立刻回覆正常？

手術後大部份病人即時會感覺到視力好轉，睇嘢無咁暗，黑影範圍縮小。經過兩三個月，大部份病人感覺視力和正常差不多。康復的程度和進度最決定性的因素，是手術前視覺神經受壓幾耐，壓的時間越短，康復越快，越好。上段提過40幾歲腦下垂體瘤的病人，我用經鼻孔內視鏡手術把腫瘤移走，表面完全冇傷口。手術後兩三星期。視力已經完全正常。至於嗰位比家人話發雞盲，成日撞到嘢嗰位伯伯，接受電腦導航微創腫瘤切除手術後一個月，視力亦都回復正常，唔洗比屋企人話發雞盲。腦膠質瘤的手術比較複雜，因為腫瘤在大腦入面，全身麻醉後又監察唔到視力，有時要用清醒開髗骨腫瘤切除腫瘤，一路追逐少逐少切除腫瘤，一路比一啲文字和圖畫比病人讀，如果病人視力有些少變化便停止腫瘤切除。如果咁做視力多數都保持得很好。視力唔係立刻好返哂，但幾個星期可以康復，都唔算太耐。

8. 治療後仍需要定期接受檢查？

腦部腫瘤有機會覆發？腫瘤手術後通常要跟進5至10年。除咗見醫生，還會做磁力共振，手術後第一次磁力共振大約是手術後3至6個月，之後每年或隔一年覆照。10年都沒有復發就是斷尾。視乎是甚麼腫瘤，良性腫瘤覆發機會約百份之五，惡性腫瘤復發機會高好多，所以有機會進行放射治療或化療。即使有復發也不要太擔心，一般定期覆診發現的腫瘤復發會比原本的腫瘤細好多，亦多數沒有症狀，未必要再做手術的，局部精準的放射治療亦都是方法。

總結:視力出現問題，好似有黑影摭住視視，如果換眼鏡不能改善，檢查眼球和眼底都找唔到原因，便要想是不是腦腫瘤的影響。現今一般腦腫瘤的治療都很安全，視力可以改善。